СИТИ их сургууль ядуурлыг бууруулах, зорилтот бүлгийн оюутнуудад боловсролын тэгш хүртээмжийг хангах чиглэлээр олон төрлийн бодлого, хөтөлбөр хэрэгжүүлж байна. Сургалтын тэтгэлэг, цалинтай дадлага, ажлын байрны зуучлал зэрэг арга хэмжээ нь эдийн засгийн боломж багатай оюутнуудад суралцах, төгсөхөд нь бодит дэмжлэг үзүүлж байна. Мөн орон нутгийн иргэдийн амьдралыг сайжруулах чиглэлээр санхүүгийн болон боловсролын дэмжлэг үзүүлж, тогтвортой хөгжлийн зорилтуудыг хэрэгжүүлэхэд идэвхтэй оролцож байна.
Манай сургууль бүх талаараа ядуурлыг арилгах хөтөлбөр, бодлогыг хэрэгжүүлэхийн тулд орон нутаг, бүс нутаг, үндэсний болон дэлхийн түвшинд бодлого боловсруулахад оролцдог бөгөөд Багшийн хөгжлийн газрын захирал М.Мөнхжаргал, профессор Л.Галбадрах нар JCI Mongolia байгууллагын удирдах түвшинд ажиллаж ядуурлыг багасгах бодлого, хөтөлбөрийг хэрэгжүүлэхэд идэвхитэй оролцож байна. Манай Бизнесийн сургууль “Үндэсний экспортын стратеги” боловсруулах ажилд оролцож Монгол улсын эдийн засгийн өрсөлдөх чадвар нэмэгдүүлэхэд хувь нэмрээ оруулсан. Мөн Хүмүүнлэгийн ухааны сургууль нь “Сэлэнгэ аймгийн Сайхан сумын иргэдийн ядуурлыг бууруулах бодлого” баримт бичгийг боловсруулахад тус сумын Засаг даргын тамгын газартай хамтран ажилласан. Бодлогын хүрээнд хэрэгжүүлсэн бичил төсөл нь зорилтот бүлгийн айл өрхүүд хүнсний ногоо болон мод үржүүлгийн аж ахуй эрхлэх боломж олгосон.
СИТИ их сургууль нь өрхийн тодорхой зорилтот бүлэгт багтдаг оюутнуудад сургуулиа амжилттай дүүргэхэд нь туслах хөтөлбөртэй. Үүнд:
1. Ахлах курсийн цалинтай дадлагажигч оюутан хөтөлбөр”-т бизнесийн удирдлага, нийгэм, хүмүүнлэгийн чиглэлийн оюутнууд Япон улсад 1 жилийн цалинтай дадлага хийдэг. Тус хөтөлбөрт хамрагдсан оюутнуудын 70 хувь нь зорилтот бүлгийн өрхөд харьяалагдаж байна.
2. Байгаль орчин, аялал жуучлалын яамнаас зохион байгуулдаг "400 000 000 төгрөгийн тэтгэлэгт дадлага” улсын уралдаанд Бизнесийн сургуулийн оюутнууд оролцож, цалинтай дадлага хийж байна. Энэхүү уралдаанд зорилтот бүлгийн оюутнуудыг түлхүү оролцуулах тал дээр анхаарч ажилладаг.
3. Төгсөх курсын оюутнуудын дунд “Ажлын байрны нээлттэй өдөрлөг”-ийг жил бүр зохион байгуулдаг.
4. Ахлах курсын оюутнууд кредитээ нөхөх, хичээлээ давтан суралцах боломж олгодог Moodle онлайн сургалтын нээлттэй платформтой.
“СИТИ их сургуулийн элсэлтийн журам 2024” -ийн 7.1 -д Монгол улсын зорилтот бүлэгт багтдаг оюутнуудыг элсүүлэх заалтыг тодорхой тусгасан. Үүнд:
7.1. Зорилтот бүлгийн элсэгчдэд дараах дэмжлэгийг үзүүлнэ.
7.1.1. Элсэгч оюутанд сургалтын төлбөрийн 30 хувь хүртэлх тэтгэлэг олгоно.
7.1.2. Сургалтын нэмэлт үйлчилгээ: - Мэргэжлийн чиг баримжаа олгох сургалт, хичээлд хоцрогдож буй суралцагчдад нэмэлт хичээл, давтлага өгөх; - Хөгжлийн бэрхшээлтэй иргэдэд зориулсан тусгай хөтөлбөрүүд, дэмжих үйлчилгээ үзүүлнэ.
7.1.3. Суралцагчдад шаардлагатай сэтгэлзүйн зөвлөгөө өгөх, нийгэм болон боловсролын орчинд дасан зохицох, суралцах арга барилаа хөгжүүлэхэд нь туслана.
7.1.4. Суралцагчдыг хөдөлмөрийн зах зээлд бэлтгэх, дадлага хийх, ажлын байранд туршлага судлах боломж олгоно
7.1.5. Онлайн сургалтанд оролцох боломжгүй суралцагчдад техник хэрэгслээр дэмжлэг үзүүлэх, интернет, компьютер болон холбогдох хэрэгслүүдийг хөнгөлөлттэй болон үнэгүй ашиглуулна.
2023 онд СИТИ их сургуульд элсэгчдийн 1.9 хувь буюу 62 оюутан амьдралын боломж муутай өрхийн гишүүн байсан бөгөөд эдгээр оюутнуудад сургалтын төлбөрийн дэмжлэг үзүүлэхэд 96.8 сая төгрөгийн санхүүжилт хийгдсэн байна. Мөн тус онд оюутны боловсролыг дэмжих ЗГ-ын үйлчилгээнд дараах оюутнуудыг хамруулсан. Үүнд:
1. Нэг өрхийн 3 буюу түүнээс дээш суралцагч -6 оюутан,
2. Эцэг эх асран хамгаалагчгүй бүтэн өнчин -25 оюутан,
3. Өөрөө хөгжлийн бэрхшээлтэй -6 оюутан
4. Хөдөлмөрийн чадвар алдсан өрхийн -21 оюутан
5. Сувилагчийн хөтөлбөрөөр суралцагч -4 оюутан
“СИТИ их сургуулийн бакалаврын журам”-ын 7.2 дугаар зүйлд зорилтот бүлгийн оюутнуудыг сургууль төгсөхөд нь дэмжлэг үзүүлэх тухай тодорхой тусгагдсан.Үүнд:
7.2. Зорилтот бүлгийн төгсөгч оюутанд үзүүлэх үйлчилгээ
7.2.1. Зорилтот бүлгийн төгсөгч оюутанд сургалтын төлбөрийн тодорхой хувийг хөнгөлөх, нийгмийн амьдралд дасан зохицох, амьдралын зардлаа бүрдүүлэхэд зориулсан мөнгөн тусламж үзүүлэх, мэргэжлээрээ ажил олоход нь туслах, сэтгэл зүй, стрессээс гарахад туслах үйлчилгээ үзүүлэнэ.
7.2.2. Орон нутгийн төрийн байгууллага, Олон нийтийн байгууллага, төрийн бус байгууллага болон хувийн секторуудын зүгээс зорилтот бүлгийн оюутнуудад чиглэсэн хандив, тусламжийн арга хэмжээ зохион байгуулна.
“Бага болон дунджаас доош орлоготой орнуудын ядуу оюутнуудыг дэмжих хөтөлбөр” 2024 оноос хэрэгжиж эхэлж байна. Тус хөтөлбөрөөр Непал улсын иргэн суралцах хүсэлт өгсний дагуу СИТИ их сургуульд оюутнаар бүртгэж суралцах эрх олгоод байна.
СИТИ их сургууль нь холбогдох боловсрол, нөөц бололцоогоор дамжуулан санхүү, нийгмийн хувьд тогтвортой бизнесийг эхлүүлэхэд дэмжлэг үзүүлэх зорилгоор дараах ажлуудыг хийгээд байна.
1. Манай “СитиЗон” инновац, бизнес хөгжлийн төв нь орон нутгийн жижиг, дунд үйлдвэрлэл, үйлчилгээ эрхлэгчдэд мэргэжил, арга зүйн зөвлөгөө өгч ажилладаг. Мөн уг төвд олон нийтийг хамарсан эвэнт, арга хэмжээнүүдийг үнэ төлбөргүй зохион байгуулдаг.
2. Хүмүүнлэгийн сургуулиас гадаадад ажиллаж амьдрахаар явж буй иргэдэд Солонгос, Япон хэл, Монгол улсад бизнес эрхлэж байгаа гадаадын иргэдэд Монгол болон Англи хэлний 45 хоногийн сургалтыг тогтмол явуулдаг.
3. Хувцасны зохион бүтээлт технологийн лаборатори нь үйлдвэрлэлийн зориулалттай Shanggong BSL5550 маркийн шулуун оёдлын машин 12 ширхэгийг өрхийн үйлдвэрлэл эрхлэх эмэгтэйчүүдэд дэмжлэг болгон хандивласан.
СИТИ их сургууль нь орлого багатай өрхийн оюутнуудад их дээд сургуулиа төгсөхөд нь дэмжлэг үзүүлэх зорилготойгоор дараах ажлуудыг зохион байгуулсан.
1. Төгсөгчдөд зориулж Монголын хамгийн том ажлын байрны зарын платформ www.zangia.mn-ыг СИТИ их сургуулийн Web site-д байршуулж тусалдаг.
2. Төрийн болон хувийн хэвшлийн томоохон аж ахуй нэгж байгууллагуудтай хийсэн хамтын ажиллагааны гэрээ, санамж бичгийн дагуу ажлын байраар хангадаг. Тухайлбал: Цагдаагийн ерөнхий газар, Шүүхийн тамгын газар, боловсролын байгууллагууд болон худалдаа, банк санхүүгийн байгууллагууд гэх мэт.
3. Тухайн бүлгийн төгсөх курсын оюутанд сургалтын төлбөрийн тодорхой хувийн тэтгэлэг тусламж олгодог.
4. Тухайн бүлгийн төгсөх курсын оюутанд Хууль зүйн сургуулиас хууль зүйн үнэгүй зөвлөгөө үзүүлдэг.
Манай сургууль нь орон нутгийн иргэдэд санхүүгийн болон нийгмийн тогтвортой бизнесийг эхлүүлэхэд нь санхүүгийн туслалцаа үзүүлдэг бөгөөд Баянзүрх дүүргийн иргэнд гоо сайхны салон нээхэд зориулж 2 сая төгрөгний мөнгөн тусламж, мөн тус дүүргийн иргэнд Хятад хэлний орчуулгын товчоо байгуулахад зориулж 3 сая төгрөгний мөнгөн тусламж, Сүхбаатар дүүргийн 7-р хорооны иргэнд хүүхдийн тоглоомын онлайн дэлгүүр нээхэд нь зориулж Номын сангийн албанаас 5.5 сая төгрөг, Баян-Өлгий аймгийн иргэнд цэцэг үрсэлгээний ажил эрхлэхэд нь зориулж 5 сая төгрөгийн хандив, тусламжийг тус тус үзүүлсэн байна.
СИТИ их сургууль бүх нийтийн суурь үйлчилгээний хүртээмжийг сайжруулах чиглэлээр сургалт, хөтөлбөр зохион байгуулдаг бөгөөд Гоо сайхны сургуулиас “Эрүүл хооллолт”, “Охидын ариун цэврийн хэрэглээ”, “Үсээ хэрхэн зөв угаах вэ?” сэдэвт сургалтыг Нийслэлийн ЕБ-ын 62, 159, 48 болон тусгай сургалттай 29, 116-р сургуулийн ахлах ангийн сурагчдын дунд зохион байгуулж нийт 500 гаруй сурагчид хамрагдсан.
