Эрхэм оюутан залуус, багш ажилчид, уншигчдадаа энэ өдрийн мэндийг хүргэе. “СИТИ” Их сургуулийн “CITI CAMPUS NEWS” сонины анхны дугаарыг та бүхэнд өргөн барьж байгаадаа баяртай байна. “CITI CAMPUS NEWS” сониноороо дамжуулан сургуулийн үйл ажиллагааг цаг алдалгүй хүргэх, оюутан, багш нарын дуу хоолойг нийтлэх, шинэлэг санал санаачилга, мэдлэг мэдээллийг хүргэх зорилготой билээ. Энэхүү сонин нь оюутан залуусын бүтээлч үйл ажиллагаа, сургуулийн амьдралын өнгө төрхийг тольдон харуулахаас гадна, хамтдаа бүтээж буй амжилт, ололтыг хуваалцах чухал гүүр болох юм.
Бид анхны дугаартаа "СИТИ" Их сургуулийн Хууль зүйн сургуулийн багш, доктор Ц.Мөнхдэлгэрээс эрхзүйн чиглэлээр суралцаж буй оюутнууддаа зориулж ярилцлага авсан бол, Оюутны лигийн дөрвөн удаагийн аварга “АЯНГА” багийн гишүүн Б.Маргадын сонирхолтой ярилцлага, Урлагийн сургуулийн Эстрад дуулаачийн IV курсийн оюутан, дуучин М.Өлзийсайханы ярилцлага болоод Төгсөгчдийн буландаа Диииид продакшны хамт олныг урьж оролцууллаа. Түүнчлэн “Ном ярьж өгье” буландаа бид Дашдоржийн Дэмбэрэлцэрэн номыг онцолж, “СИТИ” Их сургуулийн бүрэлдэхүүн сургуулиудын мэдээ мэдээллийг багтаалаа. Бид цаашдын дугааруудаа улам чамбайруулж, оюутан залуус та бүхний мэдлэг мэдээлэлд хувь нэмэр оруулах зүйлсийг бэлтгэхээр зорьж байна. Шинэ мэдлэг, шинийг эрэлхийлэгч та бүхний сэтгэлд нийцсэн, үр өгөөжтэй сонин байх болно гэдэгт итгэж байна.
“CITI CAMPUS NEWS” редакцын баг